Ҫӗрпӳ районӗнчи прокуратура ялсенче плотинӑсене епле тытса тӑнине тӗрӗсленӗ.

Пакунлисем палӑртнӑ тӑрӑх, Мӑнҫут, Сунтал, Ҫатра Вӑрманкас, Пайкилт ялӗсенчи ҫак сооруженисене тивӗҫлипе тытса тӑманнине тупса палӑртнӑ. Вырӑнти хӑйтытӑмлӑх органӗсем ку ӗҫ ҫине ал сулнӑ тейӗн, плотинӑсемпе хӑрушсӑр усӑ курассипе яваплисене те палӑртман.

Плотинӑсен тӑпри япӑхса кайнӑ, тӑпрана тӗрлӗ чӗрчун чавса пӗтернӗ. Плотина ҫинче йывӑҫ-тӗм ӳснӗ. Шыв шахтисене йӑлари ҫӳп-ҫапран тасатман.

Куславкка районӗнчи пӗр ялта пурӑнакан Лукьяновсем ҫӗр ҫырли туса илме тӗллев лартнӑ. Ҫав ӗмӗтпе хавхаланса Анна Лукьянова патшалӑх контрактне алӑ пусса хыснаран укҫа илнӗ те ӑна хушма хуҫалӑха аталантарма янӑ. Тӗрӗсрех каласан, ҫӗр ҫырлин чаплӑ йышши сортне туяннӑ.

Малтанах вӗсем шикленнине пытарамаҫҫӗ: «Калча вӑй илӗ-и? Туса илме пултарӑпӑр-и?» Анчах пӗрремӗш ана ҫырла пама тытӑнсан хӗрарӑм хавхаланнӑ, халӗ вӑл ҫырла лаптӑкне пысӑклатма ӗмӗтленет.

Аннӑн упӑшки хурт-хӑмӑр ӗрчетет.

Алекна Алексеева архивӗнчи сӑн.

Етӗрне тӑрӑхӗнчи Вӑрманкас Етӗрнере пурӑнакансем ял уявӗнче савӑннӑ.

Хӑнасем Патшалӑх истори архивӗнчи документсемпе паллашма пултарнӑ. 1911 ҫултанпа упранакан хутсенче ҫемьесенче миҫе ҫын, миҫe выльӑх пулнине ҫырса кӑтартнӑ. Ку ҫынсемшӗн питӗ кӑсӑклӑ пулнӑ.

Ял пурнӑҫне уйрӑмах хастар хутшӑнакансем вара Етӗрне округӗн пуҫлӑхӗн Станислав Трофимовӑн Тав ҫырӑвне тивӗҫнӗ. Ҫак йышра 6 ҫын пулнӑ.

mintrud.cap.ru сӑнӳкерчӗкӗ

Вӑрмар районӗнчи Мӑнҫырма ялӗнче пурӑнакан арҫын патшалӑх укҫипе сурӑх туяннӑ. Хушма хуҫалӑха аталантарма тесе социаллӑ контракта вӑл кӑҫалхи нарӑс уйӑхӗн 25-мӗшӗнче алӑ пуснӑ.

Укҫапа Владимир Матвеев дорпер ӑратлӑ сурӑх туяннӑ. Ӑна аш валли усраҫҫӗ. Специалистсем ӗнентерне тӑрӑх, ку ӑрат пысӑк тухӑҫлӑ, лайӑх ӳсет.

«Социаллӑ контаркт мар пулсан хам тӗллӗн ун чухлӗ сурӑх туянайман пулӑттӑм», - тет иккен хушма хуҫалахра тар тӑкма хавхаланнӑ арҫын.

"Контактри" сӑн

Канаш округӗнчи Асхва ялӗнче пурӑнакансем авалхи ҫӑлкуҫа ҫӗнӗрӗн хута янӑ.

Вӑл Канаш урамӗнче вырнаҫнӑ. Ӑна, ҫӑлкуҫ-тӑрна евӗрскере, вырӑнти ӑстасем юсаса йӗркене кӗртнӗ. Ӗлӗк шӑпах ҫак мелпе шыв ӑснӑ.

Палӑртмалла: ҫак ӗлӗкхи ҫӑлкуҫ – 200 ҫулта.

vk.com/mintrud_21 сӑнӳкерчӗкӗ

Каҫал тӑрӑхӗнче пурӑнакан Сергей Леонтьевялта ӗҫлеме яланах ӗмӗтленнӗ. Ялти хуҫалӑха патшалӑх укҫипе, социаллӑ контракт йӗркипе, аталантарма май пуррине пӗлсен ҫамрӑк арҫын хытах ҫунатланнӑ.

Социаллӑ контаркта ала пуснӑ хыҫҫӑн панӑ укҫапа вӑл 15 вӑкӑр туяннӑ.

«Выльах-чӗрлех ӗрчеетссипе ҫине тӑма эпӗ унчченех ӗмӗтленнӗ», — каласа кӑтартнӑ Сергей.

Тури Типҫырма ялӗн халӑх тетелӗнчи страницинчен илнӗ сӑнӳкерчӗк

Красноармейски тӑрӑхӗнчи Тури Типҫырма ялӗнче пурӑнакансем канмалли кун тӑван тӑрӑха тирпейлесе илемлетме ял-йышпа пӗрле урама тухнӑ.

«Ял илемӗ таса пулни пӗтӗмпех хамӑртан, унта пурӑнакансенчен ҫеҫ мар, канмалли кунсенче тӑван киле килекенсенчен те нумай килет. Тури Типҫирмасем ҫакна чун-чӗререн ӗненсе тӑраҫҫӗ, тӑван яла илем кӳме пӗтӗм вӑй-халне хураҫҫӗ», — тесе хыпарланӑ ялӑн халӑх тетелӗнчи страницинче.

Ял старости субботника хутшӑнакансене лотерея билечӗсем парса хавхалантарнӑ.

"Контактри" сӑн

Канаш округӗнчи Юмансар ялӗнче пурӑнакан ҫынсем хӑйсен укҫипе кӗпер тунӑ. Василий Сергеевич Никифоров ӑна Канаш тата Шкул урамӗсенче вырнаҫтарнӑ.

Вырӑнти администраци ӑна тав тунӑ куншӑн. Василий Сергеевича Анатолий Степанов, Игорь Ложкин, Александр Ануфриев, Александр Григорьев, Андрей Степанов, Алексей Арефьев кӗпере вырнаҫтарма пулӑшнӑ.

"Контактри" сӑн

Тӑвай муниципалитет округӗнчи пӗр ялта хӑйне евӗр ҫурт пур. Кун пирки «Контактра» халӑх тетелӗнчи «Pro Янтиково» ушкӑн пӗлтернӗ.

Ҫав ҫурта кил хуҫисем Раҫҫей ялавӗнчи тӗссемпе илемлетнӗ: хӗрлӗ, кӑвак тата шурӑ. Ҫапла ҫурт ялав пекех курӑнать.

Ахӑртнех, унта Тӑван ҫӗршыв патриочӗсем пурӑнаҫҫӗ.

vk.com/gov_cap_ru сӑнӳкерчӗкӗ

Чӑваш Енре ҫурхи ака-суха валли хатӗрленме тахҫанах тытӑннӑ ӗнтӗ. Ҫывӑх вӑхӑтра Гостехнадзор инспекторӗсем ял хуҫалӑх техникине тӗрӗслеме пуҫлӗҫ. Инспекторсем ӗҫе пуш уйӑхӗн 20-мӗшӗнче пуҫӑнӗҫ, тӗрӗслев ака уйӑхӗн вӗҫӗччен пырӗ.

Техникӑна тӗрӗслеме ыйтса заявкӑна Патшалӑх пулӑшӑвӗн пӗрлехи порталӗ урлӑ та пама пулать.

Ялта пурӑнакансем хӑйсен техникине хӑйсен тӑрӑхӗнче техосмотр иртнӗ чух та тӗрӗслеттерсе юлаяҫҫӗ. Хӑш муниципалитет тӑрӑхӗнче хӑҫан тӗрӗслессине Гостехнадзор хӑйӗн сатйӗнче хыпарланӑ.